Հոկտեմբեր 29, 2026
Ադրբեջանի նախագահ Իլհամ Ալիևն ուղղակի և անուղղակի շարունակում է տարբեր դեպքերի համատեքստում Հայաստանի «գործողությունների» համար իրավական գնահատական պահանջել:
Հոկտեմբերի 28-ին Ադրբեջանի հասարակական կազմակերպությունների ազգային ֆորումը հայտարարություն է տարածել, որում, մասնավորապես, նշվում է.
«Բարդայի ողբերգությունը ծանր հանցագործություն է, որը ևս մեկ անգամ ցույց է տալիս պատերազմի ընթացքում քաղաքացիական բնակչության պաշտպանության կարևորությունը: Մենք կարծում ենք, որ Բարդայում խաղաղ բնակիչների մահվան պատճառ դարձած հարձակումները պետք է օբյեկտիվ գնահատականի արժանանան միջազգային իրավունքի շրջանակում, իսկ մեղավորները ենթարկվեն պատասխանատվության։
Ադրբեջանական քաղաքացիական հասարակությունը միջազգային հանրությանը կոչ է անում սկզբունքային դիրքորոշում որդեգրել Բարդայի ողբերգության և պատերազմի ընթացքում խաղաղ բնակչության դեմ իրականացված այլ հարձակումների հարցում:
Չպետք է մոռանալ անմեղ մարդկանց կյանքի իրավունքի կոպիտ խախտման մասին: Եվ անհրաժեշտ է հետևողական ջանքեր գործադրել՝ զոհերի իրավունքները պաշտպանելու և արդարությունը վերականգնելու համար։
Արդարության ապահովումը ոչ միայն հարգանքի տուրք է ողբերգության զոհերի հիշատակին, այլև՝ ապագայում նման հանցագործությունների կանխարգելման կարևոր պայման։
Արդարությունն ու խաղաղությունը միմյանց բացառող հասկացություններ չեն»:
Հիշեցնենք, որ պատերազմի օրերին «Գյանջայի դեպքերից» հետո՝ 2020 թ. հոկտեմբերի 27-ին և 28-ին, Բաքուն Երևանին մեղադրել էր Բարդայի (Պարտավ) քաղաքի ուղղությամբ հարվածներ հասցնելու համար:
«Հայաստանի զինված ուժերը «Սմերչ» համազարկային կրակի ռեակտիվ համակարգից գնդակոծել են Բարդա քաղաքը, որը գտնվում է Ղարաբաղում մարտական գործողությունների գոտու մերձակայքում։ Հոկտեմբերի 28-ին՝ մոտավորապես ժամը 13:00-ին (Մոսկվայի ժամանակով՝ 12:00-ին), Բարդա քաղաքի մարդաշատ թաղամասերին արգելված կասետային զինամթերքի կիրառմամբ հրթիռային հարվածի հետևանքով զոհվել է 21 խաղաղ բնակիչ, շուրջ 70-ը՝ վիրավորվել»,- հայտարարել էր Ադրբեջանի պաշտպանության նախարարությունը:
Նուն օրը՝ հոկտեմբերի 28-ին, ՀՀ պաշտպանական գերատեսչությունը «Սմերչի» կիրառմամբ հարվածներ հասցնելու այս մեղադրանքը համարել էր անհիմն և կեղծ:
Դրանից մեկ օր առաջ էլ ՀՀ պաշտպանական գերատեսչությունը տարածել էր հետևյալ հայտարարությունը.
«Ադրբեջանական կողմի հայտարարությունը, թե, իբր, Հայաստանի տարածքից Բարդա շրջանի ուղղությամբ հրթիռային հարձակում է իրականացվել, կատարյալ սուտ է և կեղտոտ սադրանք:
Ո՛չ ՀՀ զինված ուժերը, ո՛չ Արցախի ՊԲ-ն որևէ հրթիռ չեն արձակել նշված ուղղությամբ»:
Բայց սա հետ չի պահել Ալիևի օգնական Հաջիևին, որ 2020 թ. հոկտեմբերի 28-ին պնդի, որ «Հայաստանը Բարդայում ցեղասպանական ակտ է իրականացրել»:
«Բարդայում ռազմական նշանակության որևէ օբյեկտ չկա։ Այն տարածքում, որին հրթիռը դիպել է, շուկա էր, առևտրային օբյեկտներ… Բարդայում տեղի ունեցածը ահաբեկչություն է, ցեղասպանություն։ Մենք դիմում ենք միջազգային հանրությանը՝ այս ահաբեկչությունը պետք է դատապարտվի»,-նշել էր նա:
Ավելի ուշ, երբ «հրթիռների գործով» կալանավորվել էր ՀՀ պաշտպանության նախկին նախարար Դավիթ Տոնոյանը, Հաջիևը պահանջել էր Տոնոյանին դատել նաև որպես՝ «ռազմական հանցագործ»՝ մեղադրելով նրան Գյանջայի, Բարդայի և ադրբեջանական այլ բնակավայրերի ուղղությամբ «ՀՀ զինված ուժերի կողմից հրթիռային հարվածների» համար: Եվ ոչինչ, որ գերագույն հրամանատարը Փաշինյանն էր, որ հոկտեմբերի սկզբի «Գյանջայի դեպքերի» օրերին եղել է Արցախում:
Թե ինչու է Հաջիևը թիրախավորում հենց Տոնոյանին, մեկ այլ հոդվածում անդրադարձել ենք:
Իսկ Գյանջայի և Բարդայի դեպքերը քննարկման առարկա են եղել նաև Բաքվի դատավարությունում: «Գյանջայի դեպքերով» և ոչ միայն սլաքն ուղղվել է ՀՀ զինված ուժերին և 44-օրյայի ժամանակ պաշտոնավարած ռազմական ղեկավարությանը:
Այս թեմաներով Բաքվի դատարանում հարցեր են ուղղվել Արցախի ռազմաքաղաքական նախկին ղեկավարությանը՝ Արցախի նախկին նախագահ Բակո Սահակյանին, ՊԲ նախկին հրամանատար Լևոն Մնացականյանին՝ փորձելով Հայաստանի դեմ «ցուցմունքներ» կորզել:
Վերադառնանք Ադրբեջանի հասարակական կազմակերպությունների ազգային ֆորումի հայտարարությանը, և տեղեկացնենք, որ դրա ղեկավարը Ռամիլ Իսկանդերլին է: Նա, լինելով Ադրբեջանի կառավարության քաղաքական գիծն առաջ տանող ՀԿ սեկտորի ղեկավարներից, պարբերաբեր միանում է կամ ինքն է նախաձեռնում Հայաստանի և արցախահայության դեմ ուղղված հավաքական հայտարարություններ ու բաց նամակներ, որոնք վերաբերում են ականապատ տարածքների, անհետ կորածների հարցում հայկական կողմին վերագրվող մեղադրանքներին:
Իսկանդերլին նաև Հայաստանի նկատմամբ տարածքային պահանջներ ներկայացնող «արևմտյան Ադրբեջան» քաղաքական ծրագրի ջատագովներից է: Եվ նրա այս գործելաոճը որևէ կերպ չի փոխվել, երբ նա ընդգրկվել է «Խաղաղության կամուրջ» նախաձեռնության մեջ և այցելել Հայաստան, քանի որ գտնում է «44-օրյա պատերազմում Հայաստանի միջազգային կոնվենցիաներին հակասող գործողություններին» պիտի տրվի իրավական գնահատական, որը չի հակասում խաղաղության օրակարգին:
Այսինքն, սա բաց է թողնում դուռը Նիկոլ Փաշինյանից կոնկրետ մարդկանց պահանջելու կամ Հսյաստանի վրա քաղաքական ճնշում գործադրելու:
Եվ ոչինչ, որ Ադրբեջանն ինքն է ռազմական հանցագործություններ իրականացրել 44-օրյա պատերազմում, գնդակահարել հայ քաղաքացիական անձանց: Սակայն Երևանն ինքը մոռացության է տվել այս փաստերը, որին Բաքվից հայելային պատասխան չի ստացվում, եթե մի պահ ենթադրենք, որ ադրբեջանական կողմի պահանջը հիմք ունի:
Նշենք, որ Ադրբեջանի հասարակական կազմակերպությունների ազգային ֆորումի՝ Բարդայի դեպքերի «մեղավորներին» միջազգային և ոչ միջազգային օրենքի սահմաններում պատժելու հայտարարությանը նախորդել էր Հիքմեթ Հաջիևի պնդումը, թե Հայաստանը պետք է ներողություն խնդրի ադրբեջանցի ժողովրդից:
—
Disclaimer: This article was contributed and translated into English by Hovhannisian John. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/10/29/%d5%b0%d5%a1%d5%bb%d5%ab%d6%87%d5%ab-%d5%ba%d5%a1%d5%b0%d5%a1%d5%b6%d5%bb%d5%a8-%d5%a9%d5%a1%d6%80%d5%b4%d5%a1%d6%81%d5%be%d5%a5%d5%ac-%d5%a7-%d5%a2%d5%a1%d6%80%d5%a4%d5%a1%d5%b5%d5%ab-%d5%b8/