Հոկտեմբեր 21, 2026
ԱԺ արտաքին հարաբերությունների հարցերով մշտական հանձնաժողովը հերթական նիստ է հրավիրվել, որին մասնակցում է ՀՀ արտաքին գործերի նախարար Արարատ Միրզոյանը:
ԱԺ «Հայաստան» խմբակցության պատգամավոր Քրիստինե Վարդանյանը հետաքրքրվեց՝ ԹՐԻՓՓ-ի շրջանակում Ադրբեջանի անխոչընդոտ շարժի դիմաց Հայաստանն ի՞նչ փոխադարձ առավելություններ է ստանում, և արդյո՞ք այն դետալային որևէ տեղ գրավոր արձանագրված է:
«Ձեր հարցի իմաստը սա է, որ Ադրբեջանն իրավունք է ստանալու ՀՀ տարածքով անցնել Նախիջևան՝ հիմնական Ադրբեջանից և հակառակ ուղղությամբ, և Ադրբեջանը մեր տարածքով կապելու է երրորդ երկրների հետ: Եվ ՀՀ-ն ստանալու է փոխադարձ առավելություններ՝ օգտագործել Ադրբեջանի տարածքը՝ օրինակ, երկաթուղային իմաստով կապ ունենալու Երասխից Մեղրի, և Ադրբեջանի տարածքով կապվելու երրորդ երկրների հետ: Սա է փոխադարձությունը: Հիմա, երբ հասնում ենք բեք օֆիսին, սրա իմաստն արագացումն է, սպասարկման հեշտացումը, բեռների անցումները և այլն»,- պատասխանեց Արարատ Միրզոյանը՝ նշելով, որ զգայուն հարցերը փորձ է արվել պակաս զգայուն դարձնել:
«Մենք չենք կարող հերքել, որ ՀՀ քաղաքացիների համար կարող էր հոգեբանական հարթության վրա առաջին շրջանում բարդություններ ունենալ Ադրբեջանի համապատասխան մարմինների աշխատակիցների հետ շփվելիս, և՝ հակառակը: Կոնֆլիկտը նոր է ավարտվել, խաղաղությունը նոր է, հասարակության վերքերը թարմ են, շատ զգայուն են այս տեսակ հարցերում: Եվ հասկանալի էր այս կոնտեքստում այդ շփումը նվազեցնելը: Աշխարհում էլ տենդենցն այնպիսին է, որ վերանում է ֆիզիկական շփումը: Այս բոլոր գործոնների համադրության արդյունքում եղել է գաղափար՝ ունենալ ֆրոնտ օֆիս և բեք օֆիս, որոշումների կայացումը կատարվում է բեք օֆիսում: Այսինքն, բեք օֆիսում ՀՀ համապատասխան ծառայության պաշտոնյան կայացնելու է որոշում, ընդհուպ՝ միջամտության, եթե անհրաժեշտություն լինի»,- շարունակեց նա:
Այս համատեքստում Արարատ Միրզոյանն ասաց, որ չի պատկերացնում նավթամուղ կամ գազամուղ Մեղրիի երկաթուղու տարածքի երկայնքով, այդտեղ տեղ չկա, քիչ տարածք կա:
«Այդտեղ կա գետ, կա մի փոքր շերտ և կան ժայռեր: Այդտեղով կարող է անցնել երկաթուղին, էլեկտրահաղորդման բաներ… և եղել են Խորհրդային Միության ժամանակ: Նավթամուղ և գազամուղ այդտեղ չեմ պատկերացնում»,- շեշտեց ՀՀ արտաքին գործերի նախարարը՝ պնդելով, որ դա մեր երկաթուղին է, և մենք իրավունք ունենք այդ ռելսի վրա բան դնել և տանել դեպի Նախիջևան և Նախիջևանով բարձրացնել Երասխ, մտցնել Հայաստան, և այնտեղից այլ հնարավորություններ կան կամ հակառակը:
«Այս կտորում մոտավորապես կա երկաթուղային կապ Իրանի հետ, և մենք այստեղ ձախ տանելուց կարող ենք իջեցնել Իրան»,- մանրամասնեց Միրզոյանը:
Մանրամասները՝ տեսանյութում
—
Disclaimer: This article was contributed and translated into English by Emil Lazarian. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/10/22/%d5%af%d5%b8%d5%b6%d6%86%d5%ac%d5%ab%d5%af%d5%bf%d5%a8-%d5%b6%d5%b8%d6%80-%d5%a7-%d5%a1%d5%be%d5%a1%d6%80%d5%bf%d5%be%d5%a5%d5%ac-%d5%a4%d6%80%d5%a1-%d5%b0%d5%a1%d5%b4%d5%a1%d6%80-%d5%a9%d6%80%d5%ab/
