Նոյեմբեր 16, 2026
Ադրբեջանական լրատվամիջոցները հայտնում են, որ ձերբակալվել է Ադրբեջանի բանտում պահվող Արցախի ԱԺ նախկին նախագահ Դավիթ Իշխանյանի փաստաբանը՝ Էլչին Ամիրովը: Ընդ որում՝ ձերբակալությունը տեղի է ունեցել մեկ քաղաքացու բողոքի հիման վրա: Ամիրովին մեղադրանք է առաջադրվել Ադրբեջանի քրեական օրենսգրքի 178.2.2-րդ (կրկին կատարված խարդախություն) և 182-րդ հոդվածներով (շորթում):
Ավելի ուշ դատարանը նրա նկատմամբ որպես խափանման միջոց ընտրել է երեք ամիս ժամկետով կալանքը։ Ներկայումս Ամիրովը պահվում է Բաքվի քննչական մեկուսարանում։
Նշենք, որ Դավիթ Իշխանյանին Բաքվի դատարանը 2026 թ. փետրվարին դատապարտել է ցմահ ազատամազրկման:
Դրանից հետո իր ուղերձում նա ասել էր, որ դատապրոցեսի վերջում չի կարողացել իր վերջին խոսքն ամբողջապես ներկայացնել:
«Ես չկարողացա դատապրոցեսի վերջում՝ իմ վերջին խոսքի ժամանակ, ամբողջական իմ խոսքը ասել․ նվազագույնը 30-40 տոկոսով այդպես էլ չթողեցին իմ վերջնական խոսքն ասել»,- ընդգծել էր Դավիթ Իշխանյանը: Ավելին, այս տարվա հուլիսին նա Բաքվից փոխանցած իր ուղերձներից մեկում հայտնել էր.
«Մինչև հիմա պաշտպանները չունեն ո՛չ մեղադրական ակտը, ո՛չ մեղադրական եզրակացությունը, և ո՛չ էլ դատավճիռը։ Դատավորը մեր պահանջներից հետո որոշում կայացրեց, որ էլեկտրոնային տարբերակով թույլ է տալիս, որպեսզի պաշտպանները ծանոթանան դատավճռին, հասկանո՞ւմ եք` ծանոթանան, այսինքն՝ նրանք չեն կարող իրենց ձեռքի տակ դա ունենալ»:
Արդյո՞ք ադրբեջանցի փաստաբան Էլչին Ամիրովի դեմ քրեական հետապնդման տողատակում կարող է Դավիթ Իշխանյանի դեմ շինծու մեղադրանքի համատեքստում որևէ դրվագ լինել, այս պահին չենք կարող ասել, բայցև չի բացառվում:
Ի դեպ, ադրբեջանական լրատվամիջոցների փոխանցմամբ, Ամիրովի ձերբակալությունից օրեր առաջ Ադրբեջանի ՆԳՆ կազմակերպված հանցավորության դեմ պայքարի գլխավոր վարչության աշխատակիցների կողմից ձերբակալվել է պետական դավաճանության և այլ ծանր հանցագործությունների համար մեղավոր ճանաչված Ռամիզ Մեհտիևի դստեր փաստաբան Ռաման Աբիշևը:
Դատավորի որոշմամբ՝ Ռ. Աբիշովի նկատմամբ որպես խափանման միջոց է ընտրվել չորս ամիս ժամկետով կալանքը։
Թե որքանով են փաստաբաններին առաջադրված մեղադրանքները հիմնավոր կամ ոչ հիմնավոր, ոչինչ պնդել չենք կարող, բայցև չենք կարող չնկատել, որ Ալիևը հետապնդում է սկսել ալիևյան ռեժիմի թիրախում հայտնված անձանց փաստաբանների նկատմամբ:
—
Disclaimer: This article was contributed and translated into English by Emma Jilavian. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/11/17/%d5%af%d5%a1%d5%ac%d5%a1%d5%b6%d5%a1%d5%be%d5%b8%d6%80%d5%a5%d5%ac-%d5%a5%d5%b6-%d5%a4%d5%a1%d5%be%d5%ab%d5%a9-%d5%ab%d5%b7%d5%ad%d5%a1%d5%b6%d5%b5%d5%a1%d5%b6%d5%ab-%d5%a1%d5%a4%d6%80%d5%a2%d5%a5/