Նոյեմբեր 9, 2026
Հայաստանում ՌԴ դեսպան Սերգեյ Կոպիրկինը Հանրային ռադիոյին տված հարցազրույցում ասել է, որ Նիկոլ Փաշինյանի և ՌԴ նախագահ Վլադիմիր Պուտինի հանդիպման համար նախապայմաններ չկան:
«Ինձ նման սցենարի մասին հայտնի չէ։ Այս հանդիպման համար ոչ մի նախապայման, որքանով ինձ հայտնի է, չի հնչել»,- ասել է դեսպանը։
Դեռևս սեպտեմբերին ՌԴ նախագահը Բիշքեկում հայտնել էր, որ Նիկոլ Փաշինյանին հրավիրել է ՌԴ՝ երկու երկրներին առնչվող հարցերի քննարկման համար։ Դրանից հետո տարբեր խոսակցություններ շրջանառվեցին, որ Փաշինյան-Պուտին հանդիպումը կկայանա հոկտեմբերի սկզբին, այնուհետ՝ հոկտեմբերի վերջին։ Սակայն մինչև այս պահն այդ հանդիպումը չի կայացել։
Քաղաքագետ Արա Պողոսյանի կարծիքով՝ տվյալ հարցում հրապարակային և կուլիսային բոլոր խնդիրները բարձրաձայնվել են, հատկապես Փաշինյան-Պուտին վերջին հանդիպման ժամանակ բոլորը տեսան, որ կողմերը բավականին սուր դիրքորոշումներ արտահայտեցին։
«Տպավորություն է, որ գոնե առաջիկայում հնարավոր չէ առաջացած խնդիրները լուծվեն։ Եթե սրան հավելենք ԵՄ անդամակցության համար դիմելու Փաշինյանի հակվածությունը, խնդիրն ավելի է բարդանում։ Այս հայտարարությունները, կարծում եմ՝ բարդացնում են հայ-ռուսական հարաբերություններում խնդիրները կարգավորելու բոլոր մտադրությունները։ Հետևաբար, քանի դեռ այդ հարաբերությունները կարգավորելու, գոնե որոշակիորեն առաջացած խառնաշփոթը շտկելու նախադրյալներ չկան՝ Փաշինյան-Պուտին հանդիպումը կհետաձգվի այնքան ժամանակ, մինչև կլինի որոշակի առիթ, օրինակ, ինչ-որ միջազգային հանդիպման ժամանակ երկկողմ հանդիպում կազմակերպելու համար»,- 168.am-ի հետ զրույցում նշեց Արա Պողոսյանը։
Ըստ քաղաքագետի՝ Փաշինյան-Պուտին երկկողմ հանդիպում կազմակերպելու համար հնարավոր է, որ լինեն որոշակի նախապայմաններ, որպեսզի որոշակի լուծումներ նախանշվեն կամ հարաբերությունները գնան կոնֆրոնտացիոն փուլի։
«Տրամաբանական է, որ մինչև այժմ Փաշինյան-Պուտին հանդիպումը չի կայանում։
Մենք հաճախ ֆիքսվում ենք հրապարակային հայտարարությունների վրա, բայց դրանք ընդամենը կուլիսային բանակցությունների կամ պայմանավորվածությունների հետևանք են։ Հրապարակային հայտարարությունները վկայում են, որ հայ-ռուսական հարաբերություններում բացասական տեղաշարժ է տեղի ունենում և բացասականից դեպի դրական տեղաշարժ չկա։ Կարծում եմ՝ հայկական կողմի համար կա քաղաքական որոշում՝ հնարավորինս սառեցնել հարաբերությունները ՌԴ-ի և հատկապես՝ ՌԴ-ի միջոցով ձևավորված միջազգային կառույցների հետ, և փորձել եվրոպական, այսպես ասած, քեյսն օգտագործել այդ հարաբերությոնների կառավարելիությունն ապահովելու համար։ Չգիտեմ՝ սա որքան կհաջողվի»,- շեշտեց Արա Պողոսյանը։
Ինչ վերաբերում է ՀԱՊԿ-ին և իշխանությունների հայտարարություններին, որ՝ «Հայաստանն այլևս որևէ հետաքրքրություն չունի ՀԱՊԿ-ի նկատմամբ», Արա Պողոսյանը նկատեց՝ ՀԱՊԿ-ում Հայաստանի համար այլևս չկան այնպիսի հնարավորություններ, որոնք կարող է օգտագործել։
«Եթե անկեղծ լինենք, ապա ՀԱՊԿ-ը Հայաստանի համար մշտապես ծառայել է որպես հայ-ռուսական հարաբերությունները չսրելու գործիք։ Եվ հիմա Հայաստանի որոշումը՝ վերջնականապես դուրս չգալ կամ գոնե սեփական նախաձեռնությամբ դուրս չգալ կառույցից, կապված է հայ-ռուսական հարաբերությունների հետագա ընթացքի հետ։
ՀԱՊԿ-ն այն գործիքներից մեկն է, որը, ըստ իշխանությունների, թույլ է տալիս ՌԴ-ին պատկերացնել, որ ՀՀ-ն կարող է ինչ-որ պահի վերադառնալ նախկին հարաբերություններին, ինչը տեսանելի ապագայում իրատեսական չէ»,- ընդգծեց Արա Պողոսյանը։
—
Disclaimer: This article was contributed and translated into English by Hovik Karapetian. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/11/10/%d5%b0%d6%80%d5%a1%d5%ba%d5%a1%d6%80%d5%a1%d5%af%d5%a1%d5%b5%d5%ab%d5%b6-%d5%b0%d5%a1%d5%b5%d5%bf%d5%a1%d6%80%d5%a1%d6%80%d5%b8%d6%82%d5%a9%d5%b5%d5%b8%d6%82%d5%b6%d5%b6%d5%a5%d6%80%d5%a8-%d5%be/