Հոկտեմբեր 9, 2026
Այսօր Հակակոռուպցիոն դատարանում «Ուժեղ Հայաստան» կուսակցության առաջնորդ, բարերար Սամվել Կարապետյանի գործով հերթական դատական նիստն էր։
Նիստի մեկնարկից առաջ, դատարանի բակում Սամվել Կարապետյանը պատասխանեց լրագրողների հարցերին։
Առաջին հարցը, որին Սամվել Կարապետյանն անդրադարձավ, վերաբերում էր Շաքի գյուղ մտած զինված ադրբեջանցի զինվորին և Նիկոլ Փաշինյանի այն հայտարարությանը, որ «Ադրբեջանցին հանցագործ է, այնպես, ինչպես Գագիկ Ծառուկյանը, Սամվել Կարապետյանը» և այլք։
«Սրա մասին մենք զգուշացնում էինք նախընտրական փուլում, և ադրբեջանցիներն առաջին քայլերն են անում։ Եթե հիմա համապատասխան հակահարված չստանան, ուրեմն՝ սա ավելի մեծ թափով կրկնվելու է։ Ես ուզում եմ իմ աջակցությունը հայտնել մեր հերոս հայ կնոջը, որ հույսը չդրեց Փաշինյանի կառավարության վրա և անձամբ պաշտպանեց իր երեխաներին, իր ընտանիքին։ Մենք մեր ձևով աջակցություն կցուցաբերենք այդ հերոս կնոջ ընտանիքին»,- նշեց Սամվել Կարապետյանը։
Սամվել Կարապետյանի խոսքով՝ առաջին հերթին սահմանը հատած զինված ադրբեջանցին պետք է պատասխան տա օրենքի ամբողջ խստությամբ, և ամեն ինչ պետք է անեն, որպեսզի նման հանցագործներին օգտագործեն հայ գերիներին Ադրբեջանից վերադարձնելու համար։
«Իմ պատկերացմամբ, իշխանություններն այդ զինված ադրբեջանցուն մի հատ կգուրգուրեն, կփայփայեն։ Հետո մի շարադրություն գրող ունեն, կնստեն իրար կողքի, հետաքրքիր մի շարադրություն կգրեն կտան ադրբեջանցու ձեռքը։ Ռուբինյանը շարադրություն գրող է, եկել է, իսկ շարադրության թեման լինելու է՝ «ինչպես կործանել Հայաստանը»։ Կտան այս մարդուն, կտանի ու տեղ կհասցնի, ինչպես արեցին Արցախի հետ՝ Արցախն էլ շարադրություններով ու փոխադրություններով հանձնեցին»,- հավելեց Սամվել Կարապետյանը։
Ինչ վերաբերում է Նիկոլ Փաշինյանի մեկ այլ հայտարարության, որը նա արեց ԱԺ ամբիոնից, որ, եթե «Աստված ոչ անի, հայ զինվոր մոլորվի ու հայտնվի Ադրբեջանում, ապա այնտեղ հայ զինվորին կսարքեն Բեն Լադեն», Սամվել Կարապետյանն ասաց, որ ամեն ինչ պետք է անեն, որպեսզի հայ զինվորը չմոլորվի ու հայտնվի ադրբեջանական կողմում, քանի որ իշխանություններն այդ ամենն այնպես են ներկայացնում, իբրև թե դրա հետ գործ չունեն։
«Բա որտե՞ղ է Պաշտպանության նախարարությունը, նախարարության այդքան գեներալները, թող ճիշտ կազմակերպեն զինվորների ծառայությունը, որպեսզի զինվորները չմոլորվեն։ Մենք բոլորս գիտենք, որ Փաշինյանն Ալիևի կամակատարն է։ Ալիևն ասել է, Փաշինյանն էլ փորձում է դրանով վախեցնել ընդդիմությանը։
Երբ մենք համախմբվեցինք, ես նույնիսկ դիմելու եմ, որ ՔՊ-ականներն էլ դիմեն մեզ, քանի որ իրենք էլ դարձել են Փաշինյանի կամակատարները։ Ցավ եմ ապրում, որ այնտեղ էլ կան արժեքավոր մարդիկ, որոնք իրավունք չունեն այս պայմաններում մնան Փաշինյանի կամակատարները»,- շեշտեց Սամվել Կարապետյանը։
Հարցին՝ զինված ադրբեջանցուն դիվերսանտ համարո՞ւմ է, Սամվել Կարապետյանը պատասխանեց, որ նրան համարում է շատ մեծ հանցագործ, հետևաբար՝ եթե շատ մեծ հանցագործ է, ապա դրա վրա ցանկացած անուն կարելի է դնել։
Մանրամասները՝ 168.am-ի տեսանյութում
—
Disclaimer: This article was contributed and translated into English by Nahapetian Zhanna. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/10/10/%d5%a1%d5%a4%d6%80%d5%a2%d5%a5%d5%bb%d5%a1%d5%b6%d6%81%d5%ab-%d5%b0%d5%a1%d5%b6%d6%81%d5%a1%d5%a3%d5%b8%d6%80%d5%ae%d5%ab%d5%b6-%d5%af%d5%a3%d5%b8%d6%82%d6%80%d5%a3%d5%b8%d6%82%d6%80%d5%a5%d5%b6/