Մոլդովայի մայրաքաղաք Քիշնևում տեղի է ունեցել «Արհեստական բանականության զարգացման հեռանկարները․ փորձի փոխանակում Եվրոպայի և Կենտրոնական Ասիայի համար» խորագրով փորձագիտական մակարդակի քննարկումը, որին մասնակցել է ՀՀ բարձր տեխնոլոգիական արդյունաբերության և արհեստական բանականության նախարարի տեղակալ Գևորգ Մանթաշյանը։
Միջոցառումը կազմակերպվել է Համաշխարհային բանկի խմբի, Եվրոպական հանձնաժողովի և Մոլդովայի Հանրապետության տնտեսական զարգացման և թվայնացման նախարարության համագործակցությամբ՝ «Connectivity Platform Meeting on Digital» հանդիպման շրջանակում։
Քննարկման մեկնարկին Համաշխարհային բանկի 2026 թվականի «Համաշխարհային զարգացման զեկույցը»՝ «Արհեստական բանականության խոստումը» (World Development Report 2026: The Promise of Artificial Intelligence), ներկայացրել է զեկույցի տնօրեն Գաուրավ Նայյարը (Gaurav Nayyar)։ Զեկույցում դիտարկվում են արհեստական բանականության՝ տնտեսական զարգացման, արտադրողականության բարձրացման, հանրային ծառայությունների բարելավման և նոր տնտեսական հնարավորությունների ստեղծման ներուժը, ինչպես նաև զարգացող երկրների համար դրա արդյունավետ կիրառման հիմնական նախադրյալները։
Զեկույցի ներկայացմանը հաջորդել է պանելային ձևաչափով փորձագիտական քննարկում, որը վարել է Համաշխարհային բանկի թվային տեխնոլոգիաների և արհեստական բանականության ուղղության ղեկավար Իզաբել Նետոն (Isabel Neto)։ Քննարկմանը մասնակցել են Համաշխարհային զարգացման զեկույց 2026-ի տնօրեն Գաուրավ Նայյարը, ՀՀ բարձր տեխնոլոգիական արդյունաբերության և արհեստական բանականության նախարարի տեղակալ Գևորգ Մանթաշյանը, Ղազախստանի Հանրապետության արհեստական բանականության և թվային զարգացման նախարարության՝ ԱԲ ուղղության տնօրենի ժամանակավոր պաշտոնակատար Երլան Օմիրժանը (Yerlan Omirzhan), ինչպես նաև Մոլդովայի AI Hub նախաձեռնության թիմի ղեկավար, AmCham-ի նախագահ և PwC-ի տնօրեն Ալեքսանդրու Գոզուն (Alexandru Gozun)։
Պանելային քննարկման ընթացքում անդրադարձ է կատարվել զեկույցի առաջարկությունների գործնական կիրառմանը Եվրոպայի և Կենտրոնական Ասիայի տարածաշրջանում, արհեստական բանականության զարգացման ազգային առաջնահերթություններին, անհրաժեշտ ենթակառուցվածքներին և տարածաշրջանային համագործակցության հնարավորություններին։
Քննարկման ընթացքում Գևորգ Մանթաշյանը ներկայացրել է Հայաստանի մոտեցումները արհեստական բանականության ենթակառուցվածքների զարգացման վերաբերյալ՝ մասնավորապես անդրադառնալով «Արհեստական բանականության գործարանների պարտեզ» հայեցակարգային մոտեցումներին։ Անդրադարձ է կատարվել նաև նման ենթակառուցվածքների ձևավորման և արդյունավետ շահագործման համար անհրաժեշտ էներգետիկ պահանջներին՝ ընդգծելով էներգետիկ կարողությունների և արհեստական բանականության ենթակառուցվածքների զարգացման փոխկապակցվածությունը։
Միջոցառման ընթացքում կարևորվել է արհեստական բանականության կիրառման համար անհրաժեշտ ենթակառուցվածքների, տվյալների հասանելիության, մարդկային կապիտալի և համապատասխան կարողությունների զարգացումը, ինչպես նաև պետական և մասնավոր հատվածների համագործակցությունը՝ տեխնոլոգիաների տնտեսական և հանրային արժեքն առավել արդյունավետ իրացնելու նպատակով։
Համաշխարհային բանկի 2026 թվականի «Համաշխարհային զարգացման զեկույցի» ներկայացումը Հայաստանում նախատեսվում է կազմակերպել «Դիջիթեք» տեխնոլոգիական ցուցահանդեսի շրջանակում՝ ՀՀ բարձր տեխնոլոգիական արդյունաբերության և արհեստական բանականության նախարարության հետ համատեղ։ Նախաձեռնությունը հնարավորություն կտա զեկույցի հիմնական դրույթներն ու առաջարկությունները ներկայացնել Հայաստանի պետական, մասնավոր և ակադեմիական հատվածների ներկայացուցիչներին՝ խթանելով դրանց շուրջ մասնագիտական քննարկումն ու համագործակցությունը։
—
Disclaimer: This article was contributed and translated into English by Emil Lazarian. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/11/13/%d5%b4%d5%a1%d5%b6%d5%a9%d5%a1%d5%b7%d5%b5%d5%a1%d5%b6%d5%a8-%d5%b6%d5%a5%d6%80%d5%af%d5%a1%d5%b5%d5%a1%d6%81%d6%80%d5%a5%d5%ac-%d5%a7-%d5%a1%d5%a2-%d5%a5%d5%b6%d5%a9%d5%a1%d5%af%d5%a1%d5%bc%d5%b8/
