Ոստիկանության տարածքային ստորաբաժանումների ծառայողների օպերատիվ-հետախուզական միջոցառումների և բացատրական աշխատանքի շնորհիվ շարունակվում են ապօրինի պահվող զենք-զինամթերքի հայտնաբերման և կամավոր հանձնման դեպքերը: Այդ մասին հայտնում են ՆԳՆ ոստիկանոթյունից:
Նոյեմբերի 10-ին Համայնքային ոստիկանության Տավուշի բաժնի ծառայողները օպերատիվ տեղեկություն էին ստացել, որ Բերդ քաղաքի 39-ամյա բնակիչը ապօրինի պահում է զենք-զինամթերք։ Նա հայտնաբերվել, ձերբակալվել և տեղափոխվել է բաժին, որտեղ բացատրական աշխատանքի արդյունքում հայտնել է, որ ոստիկանների տեղեկությունը հավաստի է։
Նախաձեռնված քրեական վարույթի շրջանակում կատարված խուզարկությամբ 39-ամյա տղամարդու տանը հայտնաբերվել են ինքնաձիգի 8 պահեստատուփ՝ լիցքավորված ընդհանուր 162 փամփուշտով, և սվին-դանակներ։
Նույն օրը Տավուշի բաժնում գրանցվել է նաև զենք-զինամթերքի կամավոր հանձնման դեպք։
Պառավաքար գյուղի 36-ամյա բնակիչը բացատրական աշխատանքի արդյունքում բաժին է ներկայացրել որսորդական ողորկափող հրացան, երկու նռնակ՝ պայթուցիչներով, և տարբեր տեսակի 169 փամփուշտ։
Ապօրինի պահվող զենք-զինամթերքի կամավոր հանձնման դեպք է գրանցվել նաև Պարեկային ծառայության Կոտայքի գումարտակի 2-րդ վաշտի պարեկների բացատրական աշխատանքի արդյունքում։
Ոստիկանություն զանգած քաղաքացին հայտնել է, որ զինամթերք է թողել Աբովյան քաղաքի Զորավար Անդրանիկի փողոցում գտնվող ենթակայանի մոտ՝ քարի տակ։ Պարեկները նշված վայրում հայտնաբերել են «ԱԿ-74» տեսակի ինքնաձիգ և 40 փամփուշտ։
—
Disclaimer: This article was contributed and translated into English by Hunanian Jack. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/11/11/%d5%a1%d5%ba%d6%85%d6%80%d5%ab%d5%b6%d5%ab-%d5%a6%d5%a5%d5%b6%d6%84-%d5%a6%d5%ab%d5%b6%d5%a1%d5%b4%d5%a9%d5%a5%d6%80%d6%84%d5%ab-%d5%b0%d5%a1%d5%b5%d5%bf%d5%b6%d5%a1%d5%a2%d5%a5%d6%80%d5%b8%d6%82/