Հոկտեմբեր 13, 2026
Շաքի գյուղում սեփական երեխաներին ադրբեջանցի զինծառայողի հարձակումից պաշտպանած Անի Ավետիսյանը շարունակում է բուժումը Երևանի «Սուրբ Գրիգոր Լուսավորիչ» բժշկական կենտրոնում:
Հասարակական լայն արձագանք ստացած միջադեպից հետո քաղաքացիների և տարբեր նախաձեռնությունների այցելությունները տուժած կնոջը չեն դադարում:
Անի Ավետիսյանի հիվանդասենյակում միշտ թարմ ծաղիկներ կան, պատվոգրեր, մեդալներ և նվեր գրքեր:
Խիզախության համար քաղաքացիական նախաձեռնությունները նրան հանձնել են «Մայր հերոսուհի» խորհրդանշական շքանշան:
Անին արդեն իսկ ենթարկվել է մի քանի վիրահատությունների, սակայն առջևում դեռ նոր միջամտությունների անհրաժեշտություն կա:
Անին ֆիզիկական ծանր վիճակի պատճառով հրաժարվեց հարցազրույցից։
«Ցավազրկող են արել, ցավեր ունեմ,- 168.am-ի հետ զրույցում նշեց նա, իսկ երեխաների մասին հարցին ի պատասխան` ասաց,- Ահավոր հոգեվիճակի մեջ են»։
Ամսվա սկզբին ՀՀ պետական սահմանն ապօրինի հատած ադրբեջանցի զինծառայողը ներխուժել է Ավետիսյանների առանձնատուն:
39-ամյա կինը տանը գտնվող անչափահաս երեխաներին պաշտպանելու նպատակով ֆիզիկական դիմադրություն է ցույց տվել զինված ադրբեջանցուն` ստանալով ազդրի և ձեռքի ծանր հրազենային վնասվածքներ, ինչպես նաև կորցրել ձախ ձեռքի մատը:
ՀՀ քննչական կոմիտեն Անի Ավետիսյանին և նրա երկու երեխաներին ճանաչել է տուժող: Ներխուժած զինծառայողը կալանավորված է. նրան մեղադրանք է առաջադրվել ՀՀ քրեական օրենսգրքի հինգ հոդվածներով, այդ թվում՝ սպանության փորձի և սահմանն ապօրինի հատելու համար:
—
Disclaimer: This article was contributed and translated into English by Antranik Varosian. While we strive for quality, the views and accuracy of the content remain the responsibility of the contributor. Please verify all facts independently before reposting or citing.
Direct link to this article: https://www.armenianclub.com/2026/10/14/%d6%81%d5%a1%d5%be%d5%a5%d6%80-%d5%b8%d6%82%d5%b6%d5%a5%d5%b4-%d5%a5%d6%80%d5%a5%d5%ad%d5%a1%d5%b6%d5%a5%d6%80%d5%b6-%d5%a1%d5%b0%d5%a1%d5%be%d5%b8%d6%80-%d5%b0%d5%b8%d5%a3%d5%a5%d5%be%d5%ab%d5%b3/