Սիսիան համայնքի Շաքի բնակավայրում ադրբեջանցի զինծառայողի կողմից վիրավորում ստացած Անի Ավետիսյանն այս պահին վիրահատվում է։ Այս մասին քիչ առաջ 168.am–ին փոխանցեց Անիի քույրը՝ Արփի Ավետիսյանը։

«Ասել էին, որ երկուշաբթի կվիրահատեն, բայց հիմա են վիրահատում։ Ասել էին, որ ճնշումը շատ ցածր է՝ 90-40 է, հեմոգլոբինը ցածր է, քանի որ շատ արյուն է կորցրել։ Անոթային վնասվածք է, բեկորային փշրվածք, ոսկորը պետք է իմպլանտով հավաքվի։ Ասել են՝ ժամը 13։00-ին, որ երեխաները կարողանան Անիին տեսնել, բայց քիչ առաջ տեղեկացրեցին, որ վիրահատությունը երկար կտևի»,- նշեց Արփի Ավետիսյանը։

Նա տեղեկացրեց, որ երեկ Անիի մոտ հիվանդանոցում մեծ քույրն է մնացել, ճնշումը կրկին ցածր է եղել, ջուր է խմել միայն։

Ինչ վերաբերում է Անիի երեխաների առողջական վիճակին, մեր զրուցակիցը փոխանցեց, որ նրանք շատ են վախեցել։

«Ադրբեջանցին  տան մեջ զենքը պահել է երկու երեխաների վրա, այդ ընթացքում մայկայով ու շալվարով է եղել, մի կողմից՝ զենքը երեխաների վրա է պահել, մյուս կողմից՝ հագնվել է։ Երբ Անին ու ամուսինը տուն են մտել, ինքը դռան հետևում է եղել, այդ ամբողջ ընթացքում զենքը երեխաների վրա է պահած եղել։ Վախեցած են երեխաները, մի անգամ հոգեբանը եկավ, խոսեց իրենց հետ։ Երեխաներին հայրը բերել է, որ մայրիկին տեսնեն, տատիկ-պապիկի տանն են, Շաքիից եկել են»,- շեշտեց Արփի Ավետիսյանը։

Հիշեցնենք, որ հոկտեմբերի 1-ին ԱԱԾ-ն պաշտոնական հաղորդագրությամբ տեղեկացրել էր, որ Ադրբեջանի զորամասերից մեկից զինծառայող է հատել ՀՀ սահմանը՝ Սյունիքի մարզի Սիսիանի հատվածում։

«Սեպտեմբերի 29-ին Ադրբեջանի Պետական անվտանգության ծառայությունը Հայաստանի Ազգային անվտանգության ծառայությանը տեղեկացրել է, որ Ադրբեջանի զորամասերից մեկի զինծառայողն անհայտ հանգամանքներում լքել է ծառայության վայրը։

Չի բացառվել, որ նա կարող էր ապօրինի հատած լինել Հայաստանի Հանրապետության սահմանը։ Դրանից հետո Հայաստանի և Ադրբեջանի իրավասու մարմիններն իրականացրել են համապատասխան որոնողական աշխատանքներ։

Հոկտեմբերի 1-ին՝ ժամը 14։15-ին, ՀՀ ՆԳՆ 112 օպերատիվ կառավարման կենտրոն ահազանգ է ստացվել, որ Սյունիքի մարզի Շաքի բնակավայրում կրակել են ՀՀ քաղաքացու ոտքին։ Պարզվել է, որ հանցանքը կատարել է ադրբեջանցի զինվորը, նրան ձերբակալել են, այնուհետև՝ կալանավորել։

Նշենք, որ ադրբեջանցին վիրավորել է նաև կնոջ անչափահաս տղային, նա դաստակի հատվածում վնասվածք է ստացել։ Նրա հետ եղել է նաև անչափահաս քույրը, որը հոգեբանական ծանր վիճակում է հայտնվել։